மருந்து கடையை உடைத்து சூறை… முக்கிய ஆவணங்கள் கொள்ளை : இருவர் கைது – 5 பேருக்கு வலை..!

கோவை செல்வபுரம் எல்.ஐ.சி .காலனி சந்திப்பில் உள்ள ஒரு கட்டிடத்தில் கடந்த 21 ஆண்டுகளாக மெடிக்கல் ஸ்டோர் நடத்தி வருபவர் நாராயணன் ( வயது 45)நேற்று அதிகாலையில் ஒரு கும்பல் இவரது கடையின் பூட்டை உடைத்து உள்ளே புகுந்தது .அங்கிருந்த சாமான்களை அடித்து உடைத்து சூறையாடியது.பின்னர் அங்கிருந்த முக்கிய ஆவணங்களை திருடிவிட்டு தப்பி சென்றுவிட்டது.இதில் ரூ 6 லட்சம் மதிப்புள்ள பொருட்கள் சேதப்படுத்தப்பட்டுள்ளதாக கூறப்படுகிறது. கடையை காலி செய்வது தொடர்பாக கட்டட உரிமையாளருக்கும்,மருந்து கடை அதிபருக்கும் முன் விரோதம் இருந்து வந்தது.இதனால் இந்த சம்பவம் நடந்துள்ளது.இதுகுறித்து மெடிக்கல் ஸ்டோர் உரிமையாளர் நாராயணன் செல்வபுரம் போலீசில் புகார் செய்தார். போலீசார் வழக்கு பதிவு செய்து செல்வபுரம் ,எல்ஐ.சி.காலனி சாஸ்தா நகரை சேர்ந்த தீபன் ( வயது 26) எஸ். ஐ. எச்.எஸ் காலனி ,மூகாம்பிகை நகரை சேர்ந்த கோபால் ரத்தினம் ( வயது 44) ஆகியோரை கைது செய்தனர். கவுதம் , பிரகாஷ் உள்பட 5 பேரை தேடி வருகிறார்கள்.இவர்கள் மீது திருட்டு, சேதப்படுத்துதல்,கொலை மிரட்டல் உட்பட 5 பிரிவின்கீழ் வழக்கு பதிவு செய்யப்பட்டுள்ளது.