கோவை அரசு பள்ளி சமையல் உதவியாளர் வீட்டில் திடீர் தீ விபத்து- ரூ.2 லட்சம் எரிந்து நாசம்..!

கோவை அருகே உள்ள கோவில்பாளையம் கிழக்கு வீதியை சேர்ந்தவர் ராமமூர்த்தி. இவரது மனைவி பாக்கியலட்சுமி (வயது 40). இவர் அந்த பகுதியில் உள்ள அரசு பள்ளியில் சமையல் உதவியாளராக வேலை செய்து வருகிறார். சம்பவத்தன்று வீட்டில் உள்ள அனைவரும் வீட்டை பூட்டி விட்டு வேலைக்கு சென்று விட்டனர்.அப்போது எதிர்பாராத விதமாக வீட்டில் தீ விபத்து ஏற்பட்டது. இதனை கண்டு அதிர்ச்சி அடைந்த அக்கம் பக்கத்தினர் விரைந்து சென்று தீயை அணைத்தனர். இந்த தீ விபத்தில் வீட்டில் இருந்த துணிகள், 2 டி.வி.க்கள் மற்றும் ரூ.2 லட்சம் ரொக்க ஆகியவை எரிந்து நாசமானது. இதுகுறித்து பாக்கியலட்சுமி கோவில்பாளையம் போலீசில் புகார் அளித்தார். புகாரின் பேரில், போலீசார் வழக்கு பதிவு செய்து விசாரணை நடத்தி வருகின்றனர்.