துக்க வீட்டில் ஜெனரேட்டருக்கு பெட்ரோல் ஊற்றிய போது தீப்பிடித்து ஆசிரியை உடல் கருகி சாவு. 3 பேர் படுகாயம்.

கோவை கணபதி கே .ஆர் . ஜி. நகரை சேர்ந்தவர் ராமலட்சுமி (வயது 85) இவர் வயது மூப்பு காரணமாக உடல் நலம் பாதிக்கப்பட்டு நேற்று முன் தினம் மாலையில் உயிரிழந்தார். இதையடுத்து நேற்று அவரது உடலை அடக்கம் செய்வதற்கான ஏற்பாடுகள் நடந்தது. இதற்காக ராம லட்சுமியின் உடல் குளிர் பதன பட்டியல் (ப்ரீசர் பாக்ஸ்) வைக்கப்பட்டி ருந்தது. உறவினர்கள் பலர் வந்து துக்கம் விசாரித்தனர். வீட்டின் முன்பக்க அறையில் வைத்திருந்த ராமலட்சுமியின் உடலை சுற்றிலும் அவரது மகன்கள் முருக சுப்பிரமணியம் , ராஜேஸ்வரன், மருமகள் தனியார் பள்ளி ஆசிரியை பத்மாவதி ,மகள் பானுமதி உட்பட உறவினர்கள் பலர் இருந்தனர் .இந்த நிலையில் கணபதி பகுதியில் திடீரென மின்தடை ஏற்பட்டது. இதை தொடர்ந்து குளிர்சாதன பெட்டி செயல்பட மின்சாரம் வேண்டும் என்பதால் அதற்கு ஜெனரேட்டர் பயன்படுத்தப்பட்டது. ஜெனரேட்டரில் எரிபொருள் குறைவாக இருந்ததால் கணபதி பகுதியை சேர்ந்த ஸ்ரீ ராம் என்பவர் அதற்கு பெட்ரோல் வாங்கி வந்து ஊற்றிக் கொண்டிருந்தார். அப்போது திடீரென்று பெட்ரோல் கீழே கொட்டியது. இதனால் அதன் அருகே எரிந்து கொண்டிருந்த சிறிய விளக்கு தீ, கீழே கொட்டிய பெட்ரோலில் பட்டு குபீர் என்று தீ பிடித்தது. இதன் காரணமாக அந்த அறை முழுவதும் புகை மண்டலமாக காட்சி அளித்தது. மேலும் மூதாட்டி ராமலட்சுமியின் உடல் அருகே இருந்தமருமகள் பத்மாவதி (வயது 53)மகள் பானுமதி ( வயது 50)மகன் ராஜேஸ் வரன் (வயது 55 )மற்றும் ஸ்ரீராம் ( வயது 22 )ஆகியோர் மீது தீப்பிடித்தது. இதனால் அலறி துடித்த அவர்கள் அங்கும், இங்கும் ஓடினர். புகை மண்டலமாக இருந்ததால் 4 பேரும் ஒரு அறையில் சிக்கிக் கொண்டனர். அவர்கள் மீது தீப்பற்றி எரிந்து கொண்டே இருந்தது .உடனே அங்கிருந்தவர்கள் அந்த அறையின் பின்பக்க கதவை உடைத்து அவர்கள் 4 பேரையும் மீட்டனர். உடல் கருகிய நிலையில் இருந்து அவர்களை சிகிச்சைக்காககோவை அரசு மருத்துவமனைக்கு அனுப்பி வைத்தனர். அவர்களுக்கு டாக்டர்கள் தீவிர சிகிச்சை அளித்தனர் .இதில் மருமகள் பத்மாவதி சிகிச்சை பலனளிக்காமல் பரிதாபமாக இறந்தார். உடல் கருகியநிலையில் பலத்த காயத்துடன் இருக்கும் பானுமதி ராஜேஸ்வரன் ஸ்ரீராம் ஆகியோருக்கு தீவிர சிகிச்சை அளிக்கப்பட்டு வருகிறது. இதுகுறித்து சரவணம்பட்டி போலீசார் வழக்கு பதிவு செய்து விசாரணை நடத்தி வருகிறார்கள் மாமியார் இறந்த வீட்டில் பெட்ரோல் கொட்டி தீப்பிடித்ததால் மருமகளும் பலியானது . 3 பேர் படுகாயம் அடைந்த சம்பவம் அந்த பகுதியில் பெரும் சோகத்தை ஏற்படுத்தி உள்ளது.