கோடை காலங்களில் மின் விநியோகத்தில் எந்த பாதிப்பும் இருக்காது- செந்தில்பாலாஜி உறுதி..!

இந்நிலையில், வரும் கோடைக் காலத்த்தில் மின் விநியோகத்தில் எந்தவிதமான பாதிப்புகளும் இருக்காது என்று தமிழ்நாடு மின்சாரத் துறை அமைச்சர் செந்தில்பாலாஜி தெரிவித்துள்ளார்.

4200 மெகாவாட்டுக்கு மேல் கூடுதலாக கோடைக் காலத்தை சமாளிப்பதற்கு மின் விநியோகம் தேவைப்பட்டிருக்கிறது. இதற்காக டெண்டர் கோரப்பட்டு இறுதி செய்யப்பட்டுள்ளது என அமைச்சர் செந்தில்பாலாஜி தெரிவித்துள்ளார்.

கோவையில் தமிழ்நாடு மின்சாரத்துறை அமைச்சர் செந்தில்பாலாஜி நேற்று செய்தியாளர்களைச் சந்தித்தார்.

அப்போது அவரிடம் கோடைகாலம் தொடங்கவுள்ளதால், மின் விநியோகம் தொடர்பாக எடுக்கப்பட்டுள்ள முன்னெச்சரிக்கை நடவடிக்கை குறித்து கேள்வி எழுப்பப்பட்டது. அதற்கு பதிலளித்த அமைச்சர் செந்தில்பாலாஜி, “வரக்கூடிய ஏப்ரல், மே மாதங்களுக்கான மின் விநியோகம், கோடைக் காலத்தில் கூடுதலாக ஏற்படுகிற தேவைகளைப் பூர்த்தி செய்வதற்காக, டெண்டர் கோரப்பட்டு இறுதி செய்யப்பட்டுள்ளது. 4200 மெகாவாட்டுக்கு மேல் கூடுதலாக கோடைகாலத்தை சமாளிப்பதற்கு மின் விநியோகம் தேவைப்பட்டிருக்கிறது. இதற்காக டெண்டர் கோரப்பட்டு இறுதி செய்யப்பட்டுள்ளது.

இந்தக் கோடை காலத்தைப் பொறுத்தவரை மின் விநியோகத்தில் எந்தவிதமான பாதிப்புகளும் இருக்காது. தேவையான அனைத்து முன்னேற்பாடுகளும் செய்யப்பட்டுள்ளன. தமிழ்நாடு முதல்வர் ஸ்டாலின் இதுதொடர்பாக தெடர்ந்து ஆய்வு செய்து, முன்னேற்பாடுகளை மேற்கொள்ள அறிவுறுத்தியிருக்கிறார், அதன்படி நடவடிக்கைகள் மேற்கொள்ளப்பட்டுள்ளன” எனத் தெரிவித்தார்.

மேலும், புதிதாக சூரிய மின் சக்தி பிளாண்ட் ஏதாவது அமைப்படுமா என்ற கேள்விக்கு பதிலளித்த அமைச்சர் செந்தில்பாலாஜி, “ஏற்கெனவே 6 ஆயிரம் மெகாவாட் அளவில் சோலார் உற்பத்தி பூங்கா அமைப்பதற்கான அறிவிப்பு வெளியிடப்பட்டுள்ளது. அதற்கான டெண்டர் இப்போதுதான் கோரப் போகிறோம். டெண்டர் முடிந்தபிறகு, முதல்வர் மூலம் அடிக்கல் நாட்டும் பணிகள் தொடங்கும்” எனத் தெரிவித்தார்.

மேலும், “மின் இணைப்பு எண்ணுடன் ஆதார் எண்ணை இணைக்கும் பணியில் எந்த தொய்வும் இல்லை. எந்தச் சிக்கலும் இல்லை. ஏறத்தாழ 99.7 சதவீதம் பேர் இணைத்துவிட்டனர். இன்னும் 0.3 சதவீதம் பேர் மட்டுமே ஆதார் எண்ணுடன் மின் இணைப்பு எண்ணை இணைக்காமல் இருக்கின்றர். அந்தப் பணிகளும் இன்னும் இரண்டொரு நாட்களில் முடியும்” எனத் தெரிவித்தார்.